ამ ტრადიციის შესანარჩუნებლად და გასაგრძელებლად შეიქმნა „სოციალური სივრცე“, რომლის მისიაა ადამიანები ერთი მიზნის გარშემო გააერთიანოს, რაც ცოდნისა თუ გამოცდილების გაზიარებით გარემოსა და ერთმანეთზე ზრუნვას გულისხმობს.

ბუნებისა და ადამიანების ურთიერთკავშირით შთაგონებული „სოციალური სივრცე“ მუსიკოსთა პარკში მდებარეობს. ევკალიპტების ხეივანში სეირნობის და სხვადასხვა ხელოვანთა ძეგლების მონახულების შემდეგ სივრცის ჯადოსნურ გარემოში აღმოჩნდებით, რომელიც ადამიანების და ბუნების ჰარმონიულ თანაცხოვრებას კიდევ ერთხელ უსვამს ხაზს.

„სოციალური სივრციდან“ სულ რაღაც 400 მეტრში კი შეკვეთილის სანაპიროა, რომელსაც ფიჭვნარი და მაგნიტური ქვიშა შავი ზღვისპირეთში ერთერთ ყველაზე გამორჩეულ სანაპირო ზოლად აქცევს.

კოლხეთის დაბლობი ცნობილია "ოქროს საწმისის" მითით, რომელზეც მრავალი პიესა თუ სხვა სახის ლიტერატურული ნამუშევარი მიუძღვნიათ ცნობილ ავტორებს. რეგიონის მრავალფეროვან ეკოსისტემაში ლეგენდებით განთქმულ პალიასტომის ტბასაც აღმოაჩენთ. გაიცნობთ კოლხეთისა და მტირალას ეროვნული პარკის მრავალფეროვან ბუნებას, დენდროლოგიური პარკის უნიკალურ ფლორასა და ფაუნას. დაათვალიერებთ წვერმაღალასა და მინიატურების პარკს…

მიიღეთ შთაბეჭდილებები ახალი აღმოჩენებით, რომლებსაც დასასრული არასდროს აქვს.