სეზონური აქტივობები

ფერმერთა დღე

"ფერმერების დღე" "სოციალური სივრცის" მიერ ინიცირებული ყოველკვირეული პროექტია, რომლის მიზანი ახალგაზრდა ფერმერთა წახალისება და ოჯახური სასოფლო-სამეურნეო ტრადიციების ხელშეწყობაა. ამის პარალელურად კი გვსურს ადამიანებისთვის ჯანსაღი გარემო შევქმნათ და სტუმრები ჯანსაღი კვების მნიშვნელობაზე დავაფიქროთ, რადგან ეკოლოგიურად სუფთა პროდუქტის და საკვების გარეშე სიჯანსაღის მიღწევა ძალიან რთულია.

გასული სეზონის მანძილზე ღონისძიების ფარგლებში "სოციალურმა სივრცემ" არაერთ წარმატებულ ახალგაზრდა ფერმერს მისცა საშუალება საკუთარი პროდუქცია წარედგინა და გაეყიდა. ჩვენი მიზანი 2022 წლის სეზონზეც უცვლელია და ისევ მზად ვართ ყველა მსურველ ახალგაზრდა ფერმერს დავუთმოთ "სოციალური სივრცე".

ჩაის დღე

ჩაის კულტურა მისტიკური ფენომენია თავისებური წესებითა და ტრადიციებით, რომელთაგან ყველაზე მნიშვნელოვანი სხეულისა და გონების კონტროლია სულიერი სიმშვიდის შესანარჩუნებლად. სწორედ ეს გახდა ჩვენი ინსპირაცია „ჩაის დღე“ სოციალური სივრცის ყოველწლიურ აქტივობად გვექცია.

„ჩაის დღე“ Tea Gathering With Tea People From Batumi-სთან ერთად ხორციელდება. მის ფარგლებში ჩაის გამოფენა/დეგუსტაციასთან ერთად სივრცეში მოსულ მოგზაურებს საგანმანათლებლო ვორკშოპებსაც ვთავაზობთ, რომლის დროსაც ჩაის კულტურას და მისი დაყენების ხელოვნებას გაიცნობთ.

მოვუსმინოთ ბუნებას

"მოვუსმინოთ ბუნებას" "სოციალური სივრცისა" და Black Sea Arena- ს მიერ შემუშავებული ერთობლივი პროექტია, რომელიც ბუნებისა და მუსიკის კომუნიკაციის უნიკალური მეთოდის მეშვეობით კიდევ ერთხელ გვარწმუნებს იმაში, რომ ამ სამყაროში მცენარეებიც ისეთივე ცოცხალი არსებები არიან, როგორც ჩვენ.

მცენარეებთან შეხებით მათში წარმოქმნილი რხევები, სპეციალური მოწყობილობის დახმარებით მუსიკალურ ბგერებად გარდაიქმნება და ისე მოგვეწოდება. მსგავსი ინტერაქცია კი გვარწმუნებს, რომ მცენარეები ზუსტად ისე განიცდიან და გრძნობენ ჩვენთან კომუნიკაციას, როგორც ჩვენ ადამიანები.

პროექტი განსაკუთრებით საინტერესო ბავშვებისთვის აღმოჩნდა, რადგან სახალისოსთან ერთად საგანმანათლებლო ხასიათსაც ატარებდა და ბავშვები ამ გზით პლანეტაზე ზრუნვის საჭიროებას სწავლობდნენ. ამ დიდი გამოხმაურებიდან გამომდინარე, ეკოპროექტი "მოვუსმინოთ ბუნებას" "სოციალურ სივრცეში" წელსაც გაიმართება, თქვენ კი ისევ შეძლებთ მცენარეების ემოციების მოსმენას.

იზრუნე პლანეტაზე

„იზრუნე პლანეტაზე“ “სოციალური სივრცისა” და “ტენეს” ერთობლივი პროექტია, რომლის ფარგლებშიც ყოველწლიურად ვმასპინძლობთ ვორქშოპს. ჩვენი სურვილია ადამიანებს დავანახოთ პლასტმასით დაბინძურების მწვავე პრობლემა და ერთად მოვძებნოთ მისი გადაჭრის გზები. ამ პლანეტისთვის მნიშვნელოვან ბრძოლაში კი ისეთ კომპანიებთან დამეგობრება, რომლებიც ჩვენს პლანეტაზე ზრუნავენ ჩვენთვის განსაკუთრებულად მნიშვნელოვანია.

„სპეციალისტების აზრით, თუ პლასტმასის წინააღმდეგ ბრძოლას ჩვენს ყოველდღიურობად არ ვაქცევთ, 2050 წლისათვის მოვახდენთ ცოცხალი ორგანიზმების მასიურ გადაშენებას. იმისათვის, რომ მსგავსი მომავალი თავიდან ავიცილოთ საჭიროა შევაგროვოთ ჩვენივე გამოყენებული პლასტმასის ნივთები და შემგროვებელ კომპანიებს ჩავაბაროთ ისინი“- ამბობს „ტენეს“ დამფუძნებელი სანდრო ლილუაშვილი.